الخميس، 21 مايو 2026 07:58 ص
"المرأة تحمل أعباء تفوق الرجل"
رغم إننا بقينا في زمن فيه تطور كبير في كل حاجة إلا إن فكرة التمييز بين الرجل والمرأة لسه موجودة في مجتمعنا بشكل واضح.
دايمًا بييجي السؤال ليه في فرق أصلاً؟ وليه الست بتتحاسب بشكل مختلف عن الراجل رغم إنها ممكن تعمل نفس الدور، ويمكن أكتر كمان؟
من وجهة نظري المشكلة مش في قدرات المرأة لكن في طريقة تفكير المجتمع.
لأن ببساطة في ستات كتير جدًا بتشتغل وبتنجح في شغلها وفي نفس الوقت بتكون مسؤولة عن بيت وأسرة وبتقوم بدور الأم والزوجة بكل تفاصيله.
يعني حرفيًا شايلة مسؤوليات مضاعفة ممكن تكون أكبر من الراجل نفسه ومع ذلك بنلاقي إن في ناس لسه شايفة إن دور الراجل أهم أو إن الست أقل قدرة وده شيء مش منطقي خالص.
لأن الواقع بيقول غير كده الست أثبتت إنها تقدر توازن بين حياتها العملية والشخصية وتنجح في الاتنين وده محتاج مجهود وطاقة كبيرة جدًا.
التمييز ده ممكن يكون سببه عادات قديمة أو أفكار اتربينا عليها من زمان بس ده مش معناه إنها صح بالعكس المفروض نراجع نفسنا ونفهم إن كل إنسان له قدراته سواء كان راجل أو ست وإن المقياس الحقيقي هو الكفاءة مش النوع.
وفي النهاية أنا شايفة إن المجتمع محتاج يغير نظرته ويدي لكل واحد حقه من غير تفرقة لأن الست مش أقل من الراجل ويمكن في أوقات كتير تكون أقوى منه بقدرتها على التحمل والمسؤوليه.
© AD Brand. All Rights Reserved. Designed by Adbrand Agency
Admin User
